(ខេត្តកំពង់ធំ)៖ សង្វៀនបញ្ជល់មាន់និងអាប៉ោងដោះស្លែ ដ៏ធំ១កន្លែង នៅក្រោយភូមិអូរស្ងួត ចុះពីផ្លូវជាតិត្រង់ចំណុចបង្គោលភ្លើងលេខ១៤៦ តាមផ្លូវចម្ការកៅស៊ូ បត់ស្ដាំប្រហែល១០០ម៉ែត្រ ក្នុងចម្ការស្វាយចន្ទី ស្ថិតនៅឃុំបឹងល្វា ស្រុកសន្ទុក ខេត្តកំពង់ធំ កំពុងបើកដំណើរការអាជីវកម្ម ដោយខុសច្បាប់ យ៉ាងអនាធិបតេយ្យបំផុត!។
-ខណៈសមត្ថកិច្ចមូលដ្ឋាន ថ្លែងទទួលស្គាល់ថា ពិតជាមានការលេងល្បែងប្រាកដមែន ដោយទីតាំងនោះឆ្ងាយណាស់ ហើយអ្នកលេងល្បែងនៅតែបន្តលេងដដែលៗ រាប់ពាន់លើកមកហើយ!!។
ជាក់ស្ដែងៈ នៅវេលាថ្ងៃត្រង់ក្នុងថ្ងៃទី២៥.០៨.២០២៥ គេឃើញក្រុមអ្នកញៀនល្បែង មកពីភូមិ-ឃុំ ដែលនៅក្បែរ និងមកពីតាមបណ្ដាស្រុកផ្សេងៗ។
បានធ្វើដំណើរប្រសេកប្រសាច តាមដងផ្លូវ ខ្លះជិៈម៉ូតូឌុបគ្នា ស្ពាយកន្ត្រកមាន់ជល់ ខ្លះទៀតជិៈរថយន្តសេរីទំនើបៗ ដឹកមនុស្ស រួមនិងកន្ត្រកមាន់ជល់មកជាមួយ.!។
ដើម្បីមកប្រមូលផ្ដុំគ្នា យ៉ាងច្រើនណែនណាន់តាន់តាប់ នៅទីតាំង”សង្វៀនបញ្ជល់មាន់និងអាប៉ោង”ក្នុងចម្ការស្វាយចន្ទី ត្រង់ចំណុចខាងលើ យ៉ាងគគ្រឹកគគ្រេងបំផុត!។
សេចក្ដីរាយការណ៍បានឱ្យ«សារព័ត៌មានយើង»ដឹងថាៈ”សង្វៀនបញ្ជល់មាន់និងអាប៉ោង”ខាងលើ.!។
បានបើកដំណើរការជាយូរឆ្នាំមកហើយ ដោយក្នុង១សប្ដាហ៍លេង៧ថ្ងៃ.!។
ក្នុងនោះ ពួកគេបើកលេងចល័ត ចំនួន២ទីតាំងក្បែរគ្នា ក្នុងមូលដ្ឋានឃុំបឹងល្វា ស្រុកសន្ទុក ខេត្តកំពង់ធំ ជាប់ហ្នឹងព្រំប្រទល់ស្រុកស្ទឹងត្រង់ ខេត្តកំពង់ចាម។
បើតាមអ្នកញៀនល្បែង បាននិយាយថាៈ”សង្វៀនបញ្ជល់មាន់និងអាប៉ោង”ខ្នាតធំត្រង់ចំណុចខាងលើ គឺលេងភ្នាល់ចាក់លុយធំៗណាស់.!។
ដោយមាន់ជល់១គូៗ ពួកគេភ្នាល់ចាក់លុយ ចាប់ពី៥លានរៀល ទៅ៣០លានរៀលឯណោះ!។
ចំពោះអាប៉ោងវិញ ពួកគេភ្នាល់ចាក់លុយចាប់ពី ២លានរៀល ទៅ៤០លានរៀល ក្នុង១គ្របៗ!។
ដែលជាហេតុនាំឱ្យម្ចាស់ទីតាំង អាចប្រមូលលុយពីការ”ដកតុងហាន់សាវ”បានរាប់សិបលានរៀលក្នុងមួយថ្ងៃៗ សម្រាប់យកមករត់ការ ជាមួយអ្នកពាក់ព័ន្ធ បានយ៉ាងងាយស្រួល..!។
ជុំវិញករណីនេះ នៅរសៀលទី២៥.០៨.២០២៥"សារព័ត៌មានយើង"បានព្យាយាមសុំការបំភ្លឺពីលោក ម៉ៅ ចាន់ធី អធិការស្រុកសន្ទុក ប៉ុន្តែទូរស័ព្ទរបស់លោកជាប់រវល់រហូត...!!។
ទោះជាយ៉ាងនេះក្ដីលោក ឡង គីសឹង អភិបាលស្រុកសន្ទុក បានថ្លែងប្រាប់"សារព័ត៌មានយើង"ថា ទីតាំងខាងលើពិតជាមានការលេងល្បែងប្រាកដមែន..!។
លោកអភិបាលស្រុកបន្តថា កន្លែងនោះឆ្ងាយណាស់ បើយើងធ្វើដំណើរទៅបង្ក្រាប ប្រើរយៈពេលជិត១ថ្ងៃ.ហើយបច្ចុប្បន្ន អ្នកលេងល្បែង នៅតែបន្តលេងដដែលៗ រាប់ពាន់លើកមកហើយ!!។
ដោយលោកបញ្ជាក់ថា"ការលេងល្បែងនោះ គឺខ្នាតតូចជល់មាន់១គូ២គូ"។
បើតាមពលរដ្ឋ សកម្មភាពនៃការ លេងល្បែងខ្នាតធំ ត្រង់ចំណុចខាងលើអាចប្រព្រឹត្តទៅបាន.ពុំមែនមកពីផ្លូវឆ្ងាយ ឬពិបាកក្នុងការបង្ក្រាបអ្វីទេ។
មូលហេតុមកពីមេការល្បែងសុំលេង និងត្រូវគ្នាជាប្រព័ន្ធ ព្រោះអ្នកលេងល្បែង មិនធំជាងសមត្ថកិច្ចនោះឡើយ បើមិនមានភ្លើងខៀវ គឺគ្មាននរណាហ៊ានបើកល្បែងជាដាច់ខាត!!។
ក្នុងរឿងនេះ ពលរដ្ឋសង្ឃឹមថា លោកឧត្តមសេនីយ៍ទោ ហេង សុផល ស្នងការនគរបាលខេត្ដកំពង់ធំ នឹងចាត់វិធានការក្ដៅមិនខាន! ដើម្បីកុំឱ្យមានការបើកល្បែងខ្នាតធំ បែបនេះតទៅទៀត។
ព្រោះថា អ្នកលេងល្បែងពេលឈ្នះមុខខ្លាញ់ ពេលចាញ់មុខខ្លា បើចាញ់ច្រើនកាលណា អ្វីៗក៏ហ៊ានធ្វើ អាចកើតជាអំពើហិង្សាក្នុងគ្រួសារ.អំពើចោរលួច.ចោរប្លន់.ឬអំពើអសន្តិសុខផ្សេងៗក្នុងមូលដ្ឋាន៕
