នៅព្រឹកថ្ងៃសុក្រ ទី៥ ខែមេសា ឆ្នាំ២០២៤ ឧត្តមសេនីយ៍ ទោគង់ ប៉ក់ នាយសេនាធិការរង កងទ័ពជើងគោក បានអញ្ជើញជាអធិបតីក្នុងពិធីផ្សព្វផ្សាយ ការងារអប់រំចិត្តសាស្រ្ត ស្តីអំពី យុទ្ធសាស្ត្រ បញ្ចកោណ-ដំណាក់កាលទី១ និងជោគជ័យនៃលទ្ធផលការងារសំខាន់ៗដែលរាជរដ្ឋាភិបាលកម្ពុជា នីតិកាលទី៧នៃរដ្ឋសភា សម្រេចបានក្នុងរយ:ពេល៦ខែដំបូងជូនដល់នាយ-ពលទាហានទាំងអស់ ក្នុងទីបញ្ជាការ វិស្វកម្ម។
ឯកឧត្តមនាយសេនាធិការរង ក.ជ.គ ក្នុងឱកាសនោះ បានផ្សព្វផ្សាយ អំពីចំណុចសំខាន់ៗ អំពីយុទ្ធសាស្ត្រ បញ្ចកោណ-ដំណាក់កាលទី១ និងបានផ្សព្វផ្សាយ ប្រសាសន៍សំខាន់ៗ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលបានថ្លៃងក្នុងកិច្ចប្រជុំពេញអង្គគណៈរដ្ឋមន្រ្តី កាលពីថ្ងៃទី១៥ ខែមីនា ឆ្នាំ២០២៤ ស្តីអំពី សមិទ្ធផលលេខធ្លោនៃការអនុវត្តន៍គោលនយោបាយអធិភាពទាំង៦ចំណុច និងវិធានការគន្លឹះទាំង៥។
ឯកឧត្តមនាយសេនាធិការរង ក៏បានមានប្រសាសន៍បន្តថា៖ យោធិនទាំងពីរភេទ នៃកងយោធពលខេមរភូមិន្ទ ត្រូវចូលរួមអនុវត្តន៍យ៉ាងម៉ឹងម៉ាត់ នូវរាល់បទរបស់រាជរដ្ឋាភិបាល ត្រូវភក្តីភាពចំពោះជាតិ សាសនា ព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ ត្រូវតែគោរព និងអនុវត្តឱ្យបានរាល់បទបញ្ជាថ្នាក់លើប្រគល់ជូន ត្រូវមានវិន័យល្អ និងក្រមសីលធម៌ថ្លៃថ្នូរ។
ឯកឧត្តមនាយសេនាធិការរង បានថ្លែងអំណរគុណ និងកោតសរសើរដល់ នាយ-ពលទាហាន ទាំងអស់ដែលបានចូលរួមយ៉ាងសកម្ម ក្នុងការបំពេញភារកិច្ចនាពេលកន្លងមក ប្រកបដោយជោគជ័យ និងទទួលបានលទ្ធផលល្អប្រសើរ ។ ឯកឧត្តម មេបញ្ជាការរង បានណែនាំដល់នាយ-ពលទាហាន ទាំងអស់ ត្រូវវខិតខំយកចិត្តទុកដាក់បំពេញភារកិច្ចដែលថ្នាក់លើបានប្រគល់ឲ្យ ឲ្យបានសម្រេចតាមគោលដៅដែលបានកំណត់ ៕
