សាឡុងជាច្រើនគ្រឿងលួចបូមខ្សាច់ ទាំងថ្ងៃទាំងនោះយប់យ៉ាងគគ្រឹកគគ្រេង រំខានដល់ដំណេកប្រជាពលរដ្ឋ

   ខេត្តកោះកុង៖ សាឡុង់ប្រភេទធុនធំជាច្រើនគ្រឿងបានលួចបូមខ្សាច់នៅពេលយប់ជាច្រើនខែឆ្នាំមកហើយ នៅចំណុចព្រែកឃ្នាង ស្ថិតក្នុងភូមិចំការក្រោម ឃុំស្រែអំបិល ស្រុកស្រែអំបិល ខេត្តកោះកុង មិនដឹងថា មានច្បាប់ ឬមិនមានច្បាប់នោះទេ។

តាមការលើកឡើងរបស់ពលរដ្ឋនៅទីនោះបានឲ្យដឹងថា ព្រែកស្រែអំបិលមួយនេះត្រូវបានគេយកសាឡុង់មកបូមយកខ្សាច់ជាច្រើនឆ្នាំមកហើយ មិនដឹងថា ក្រុមហ៊ុនណាខ្លះទេ ដែលគេបូមយកខ្សាច់ទាំងយប់ទាំងថ្ងៃចាប់ពីចំណុចខាងក្រោមផ្សាររហូតមកដល់ខាងក្រោយផ្ទះប្រជាពលរដ្ឋ ដែលរស់នៅមាត់ព្រែកនេះ ធ្វើឲ្យប្រជាពលរដ្ឋមានការភិតភ័យរហូតដល់ពួកគាត់ផ្តិងមេដៃស្នើសុំឱ្យខាងក្រុមហ៊ុនទាំងនោះបូមយកខ្សាច់ឲ្យឆ្ងាយពីចំណុចមាត់ព្រែកបន្តិច ពីព្រោះថាខ្លាចបាក់ច្រាំងរលំផ្ទះពួកគាត់ តែមិនដឹងថាគេមានច្បាប់ឬអត់ច្បាប់នោះដែរ ក្រោយមកសាឡង់ទាំងនោះក៏ត្រូវបានដាក់បូមតាមបណ្ដោយព្រែកទៅក្រោម។

ពលរដ្ឋបានឱ្យដឹងទៀតថា: នៅប៉ុន្មានខែនេះមានសាឡុងជាច្រើនគ្រឿងដាក់បូមយកខ្សាច់យ៉ាងគគ្រឹកគគ្រេង ដែលគួរឲ្យចម្លែក នៅចំណុចព្រែកខ្នៀង ស្ថិតក្នុងភូមិចំការក្រោម ឃុំស្រែអំបិល ស្រុកស្រែអំបិល សាឡង់បូមយកខ្សាច់ទាំងនោះ គេមិនបានដាក់បូមនៅពេលថ្ងៃនោះទេ ពោលគឺ គេដាក់បូមនៅពេលយប់ ពាសពេញព្រែកមួយនេះតែម្ដង ហើយក្នុងចំណោមសាឡង់ទាំងនេះក៏មានសាឡង់របស់លោកឧកញ៉ាម្នាក់នៅស្រុកស្រែអំបិលនេះដែរ។

ជុំវិញបញ្ហាសាឡង់បូមខ្សាច់ខាងលើនេះ លោក ខ្លឹម យុនវិសិដ្ឋ ប្រធានមន្ទីរ៉ែ និងថាមពុលខេត្តកោះកុង បានបញ្ជាក់ថា ៖ ច្បាប់ចាប់ពីម៉ោង 6:00 ព្រឹក រហូតដល់ម៉ោង 6:00 រងាច ។ហើយប្រធានរ៉ែគាត់បានបន្តថា៖ ឱ្យទាក់ទងទៅខាងសហគមន៍ បានដឹងច្បាស់។ ប្រធានរ៉ែ គាត់បន្ថែមជាចុងក្រោយ បើធ្វើយប់គឺមិនមានច្បាប់អនុញ្ញាត គាត់នឹងមានវិធានការតាមផ្លូវច្បាប់។

ចំណែកប្រធានសហគមន៍ក្រុមសារព័ត៌មានយើង មិនមានលេខទូរសព្ទសម្រាប់ទំនាក់ទំនង ។
ជុំវិញបញ្ហាសាឡង់បូមខ្សាច់ខាងលើ ពលរដ្ឋនិងរង់ចាំមើលថា តើមន្ទីរ៉ែខេត្តកោះកុង និង ក្រសួងរ៉ែ មានប្រធានការបែបណាទៅលើសាឡង់ដែលធ្វើការលួចបូមខ្សាច់ខាងលើ៕